• आजची गझल • (भाग ४९ )
माझ्या देशामध्ये
मारोत भले बाता कोणी माझ्या देशामध्ये
नसे सुरक्षित माता कोणी माझ्या देशामध्ये
षंढासम बघतात माय बहिणींचा बलात्कारही
मर्द दिसेना आता कोणी माझ्या देशामध्ये
वंदेमातरम् नि राष्ट्रगीतही कळले खरे कुणाला?
उगी कशाला गाता कोणी माझ्या देशामध्ये
तोंड असोनी शब्द फुटेना बुद्धी ती कुचकामी
बोलत नाही ज्ञाता कोणी माझ्या देशामध्ये
देशच टाकू विकून सगळा विकास कामासाठी
करेल अशीच वार्ता कोणी माझ्या देशामध्ये
माणुसकीच्या थेंबासाठी जीव किती तडफडतो
उरला नाही त्राता कोणी माझ्या देशामध्ये
जन्म जाहला भारतात अन् जगात पसरत गेला
बुद्ध दिसेना आता कोणी माझ्या देशामध्ये
यशवंत मस्के
गंगाखेड जि. परभणी
मो. 9657594059
=•=•=•=•=•=•=•=•=•=•=•=•=•=•=•=
संयोजक
भरत माळी
मो. 9420168806
=•=•=•=•=•=•=•=•=•=•=•=•=•=•=•=
